Joven Ida ho Motor Koko Soke Aviaun Sriwijaya

Autoridade seguransa Aero Porto kaer hela suspeitu hodi motor atu soke aviaun iha aero porto Internasional Prezidente Nicolao Lobato, Komoro (14/10) Autoridade seguransa Aero Porto kaer hela suspeitu hodi motor atu soke aviaun iha aero porto Internasional Prezidente Nicolao Lobato, Komoro (14/10) Foto espesial

Tempotimor (Dili)-La hatene loos saida mak mosu iha joven ho inisial CdJ nia hanoin. Nia sa’e motor hodi tama ba areador aeroportu no halai hasoru aviaun Sriwijaya ne’ebé foin tuun iha aeroportu internasional Nicolau Lobato Komoro, Dili.

Joven ho insial CdJ ne’ebé identifika mai husi Postu Administrativu Railako, Munisipiu Ermera ne’e koko atu soke aviaun ho motor ne’ebé nia sa’e.

Tuir informasaun ne’ebé Tempotimor.com asesu, iha Segunda (14/10) tuku 13.30 OTL, CdJ uza motor Honda Revo ne’ebé la uza sapa matrikula hodi halai tama ba areador aeropotu liu husi postu 01.

Joven ne’e halai ho velusidade maka’as husi parte lorosa’e hasoru aviaun Sriwijaya ne’ebé halai husi parte loromonu.

Maibé, akontesimentu ne’ebé la espera la konsege mosu tanba seguransa sira ne’ebé asegura area aeroportu ho lalais hapara asaun joven ne’e.

Seguransa sira konsege tebe monu CdJ no pilotu aviaun Sriwijaya mós konsege trava nune’e la akontese soke malu entre aviaun ho motor.

Tuir informasaun, aviaun Sriwijaya tula hela pasajeiru hamutuk na’in 100 ida. Entre pasajeiru ne’e iha mós Embaixadora Repúblika Hellénica, Costantina Coliau no Embaixadora Bosnia Herzegovina, Asmira Merdanovic Halilovic ne’ebé tuir planu sei hato’o karta kredensial ba Prezidente Repúblika Francisco Guterres Lu Olo iha Tersa (11/10).

Hafoin akontesementu ne’e, parte Ministériu Negósiu Estranjeiru no Kooperasaun (MNEK) ho lalais evakua kedan diplomata na’in rua ne’e.

Entretantu, durante prosesu atuasaun ba suspeitu, autoridade seguransa na’in rua mós hetan kanek kaman iha parte ulun no hetan asistensia emerjensia husi mediku aeroportu nian.

Hafoin kaptura suspeitu, seguransa aeroportu entrega suspeitu ba polisia hodi kontinua prosesu investigasaun.

Rate this item
(0 votes)
Last modified on Tuesday, 15 October 2019 00:06
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com