Tuir Maijor Jeneral ne’e, prioridade ida ne’e tenke foti tanba haree ba kestaun onra no dignidade Timor Leste ninian.
"Se ita hanesan de’it entaun haruka Sekretariu Estadu (Veteranus) Gil ba taka tiha Komisaun de Verifikasaun ne'e, verifika ne'e par identifika o ne'e klandestina nia ema, rezistensia nia ema. Timor-oan ne'e ita Timor-oan hotu maibé kestaun de dignidade, kestaun de onra ita la hanesan, prioridade ba veteranu nia oan ne'e nafatin maibé tenke priense kriteriu," dehan Komandante F-FDTL ne’e iha Palasiu Prezidensial Bairopite, Kuarta (06/11/19).
Nia dehan, durante ne'e ema barak hatete no kestiona katak otonomista nia oan maibé iha balun mak nia mentalidade muda ona no sira ne'ebé dezde uluk hamutuk ho Timor bele maibé tenke iha espiritu nasionalizmu.
"Ema balun kestiona maibé ha’u laos dehan otonomista nia oan sira tanbá iha otonomista balun ne'ebé dezde 1999 hamutuk kedas ho ita iha ne'e, ha’u hanoin depois de tinan sanulu resin sira-nia mentalidade muda ona no fase kakutak ona. Ha’u dehan atu tama forsa ne'e tenke nasionalista katak esperitu nasionalizmu ne'e tenke forte," dehan nia.
Kona-ba rekrutamentu, Lere dehan, forma ona komisaun ne'ebé barak liu husi Forsa Armada hodi prepara ba prosesu no iha ona kriteria atu elabora ba governu no bainhira konsellu ministru aprova sei serbisu tuir kriteriu ida ne'e.
“Kriteriu hirak ne'e la sees husi nasionalizmu, patriotizmu ba Timor-oan ne'ebé hakarak tama ba instituisaun seguransa defeza nian, tanbá seguransa ho defeza labele kompara ho instituisaun seluk, tanbá iha militar kuandu nesesariu fó vida rasik entaun ne'e presiza nasionalizmu ne'ebé FALINTIL hatudu iha 24 anos, komisaun ne'e mai husi Xefe Estadu Maior, ofisiais, komandante komponentes no tanente sira,” Lere esplika.