Daudauk ne’e mosu video iha media sosial Facebook ne’ebé hatudu pesoal PM balun halo agresaun fiziku hasoru membru BOP balun iha area ida iha kapital Dili.
"Husi video ne'ebé hatudu halo tauk no trauma ita-nia populasaun, mais ha'u hanoin ida ne'e laiha problema. Sira ne'ebé halo seguransa hamutuk, sira sei halo konferénsia imprensa hodi husu deskulpa ba ita-nia komunidade sira," dehan Maijor Jeneral Lere iha Metiaut, bainhira partisipa iha konsolidasaun Organizasaun Sagrada Familia (OSF), Sesta (08/11/19).
Maijor Jeneral ne’e husu nafatin ba membru Instituisaun PNTL no F-FDTL atu serbisu hamutuk ho di’ak.
"Ha'u-nia apelu ba instituisaun rua, PNTL no F-FDTL, katak imi ne'e lutu ba nasaun, liu husi konstituisaun mak iha funsaun la hanesan, mais kuandu nasaun iha perigu ne'e, instituisaun rua ne'e mak hamutuk hodi tane nasaun ne'e nia naran," dehan Lere.
Lere dehan, iha ne’ebé de’it sempre iha lian naksalak no problema, maske nune’e sempre iha solusaun.
Tanba, nia dehan, dezafiu ne’ebé iha ne’e atu koko kapasidade husi membru instituisaun sira ne’e.