Ba kestaun ne’e, Xefe Estadu Maior F-FDTL, Maijor Jeneral Lere Anan Timur promete atu haree fila fali prosesu rekrutamentu ne’ebé la’o daudauk.

"Ha’u hanoin ida ne'e ha’u simu informasaun barak, orsida ou aban ha’u sei haree halo oinsa par ita-nia joven sira ne'ebé ho personal atu ba servi duni instituisaun ne'ebé hakarak ba," dehan Lere hafoin partisipa misa agradesimentu ba loron Poklamasaun Independensia iha Igreja Katedral Dili, Kuarta (27/11/19).

Prosesu rekrutamentu hahu ona iha Munisipiu hotu-hotu iha loron 25. Kada suku hetan de’it formulariu 25, ho nune’e mosu preokupasaun katak iha diskriminasaun ba joven sira ne’ebé hakarak atu konkore sai membru F-FDTL.

Tuir Lere, joven sira iha oportunidade ne’ebé hanesan atu hola parte ka fó ninia kontribuisaun ba instituisaun forsa defeza.

"Joven sira kestiona suku ida simu formulariu 25, ida ne'e kestaun mais teknika depois mak ha’u haree," Lere promete.