Dili – Iha loron 17 Jullu 2018, Korpu ba Paz organiza eventu espesial “Selebrasaun ba Servisu” hodi kongratula grupu da-hitu Voluntariu Korpu ba Paz nia servisu iha Timor-Leste. Voluntáriu nain sanulu resin hitu ne’e mai husi fatin oi-oin iha Estadus Unidus. – Koñesidu koletivamente hanesan TL7, sira sei kompleta sira nia servisu tinan rua nian iha Outobro 2018. Sira nia servisu foka liu ba dezenvolvimentu ekonomia, agrikultura, nutrisaun no hijiene ba komunidade Timor oan sira.
“Imi mak poineiru iha aspetu hotu.” Embaixadora EUA ba Timor-Leste Kathleen M. Fitzpatrick kolia durante nia diskursu. Embaixadora Fitzpatrik affirma katak voluntariu sira ne’e ajuda ona komunidade sira atu kumpriende konaba servisu Korpu ba Paz nian no parseria ho Timor oan sira. “imi nia servisu mo’os re-afirma komitmentu Estadus Unidus nian ba Timor-Leste.” Iha tempu hanesan Diretor Jeral Ministériu Negosiu Estranjeiru no Kooperasaun Isilio Coelho ne’ebé koalia hodi naran governu Timor-Leste hateten voluntáriu Amerikanu sira ne’e sai tia ona parte ida husi komunidade. Familia sira ne’ebé sira hela ba bolu sira oan mane no oan feto, maun no bin. “Ami espera atu kontinua parseria ne’ebé forte no produtivu ho Korpu ba Paz.”
Voluntáriu Korpu ba Paz mai iha eventu ne’e ho sira nia parseiru servisu no familia Timor oan hodi fahe informasaun konaba sira nia servisu hamutuk iha tinan rua nia laran hamutuk ho governu Timor-Leste, organizasaun sosiedade sivil no seluk tan iha area dezenvolvimentu komunitaria nian. “Voluntariu sira no membru komunidade Timoroan ne’ebé hamutuk ho ita ohin kria ona buat ida ne’e sei dura para sempre no valiozu, sira kria ona ‘ponte ba interkámbiu kultural’ no intendimentu” Dehan Country Director Korpu ba Paz Kavita Pullapilly. TL7 mak grupu daruak ne’ebé mai Timor-Leste hafoin re-abertura programa Korpu ba Paz nian iha 2015. Voluntariu sira ne’e destakadu iha Liquica, Ermera, Ainaro, Aileu, Dil (Atauro) no Baucau.
Atualmente, Voluntariu Korpu ba Paz 33 mak iha Timor-Leste. Amerikanu liu nain 170 mak sai ona Voluntariu Korpu ba Paz iha Timor-Leste hahu kedas husi 2002. Iha 2018, Korpu ba Paz ho Kolaborasaun Ministériu Edukasaun, Juventude no Desportu sei introduz projetu Eduk asaun lian Ingles atu voluntáriu sira hanorin lian Ingles hamutuk ho professor Timor oan sira iha terseiro ciclo no eskola sekundariu sira. (ki)
