Tuir nia, membru FALINTIL sira ne'ebé sei ativa iha instituisain F-FDTL ne'e kumpre ona sira-nia misaun. Ne'e duni, bele deskansa ona iha uma.
Maski ne'e, Jeneral Lere rasik seidauk deklara ninia prontidaun atu husik instituisaun F-FDTL hanesan mós ho liberdade ne'ebé fó ba membru FALINTIL sira seluk.
"Iha ami nian instituisaun (F-FDTL) ha'u dehan, katuas imi hakarak servisu bele servisu. Imi hakarak toba bele toba, naran katak labele komete krime. Purke sira-nia misaun kumpre tiha ona, tanba katuas sira Falur, Aluk, Sabika, kuitadu... fuk mutin hotu ona, forsa la to'o mós ita obriga sira servisu. Tanba sira hadomi institusaun ne'e mak servisu", dehan Lere, iha Palásiu Prezidensiál, Bairru-Pité, Sesta (7/2).
Entre instituisaun F-FDTL no PNTL, nia dehan, F-FDTL pelumenus bele garante hodi marka pozisaun hanesan lutu ba nasaun.
Entretantu, iha instituisaun PNTL, agora daudaun konfia hela joven ida hodi komanda, maibé komanda fali eis-polisia ne'ebé ho idade avansadu, tanba ne'e dala ruma sei komplikadu bainhira fó orden ba katuas sira ne'e.