Seidauk iha serteza kona-ba kauza ne'ebe halo ahi han uma, maibe iha ipoteza 3, primeiru sirkuitu eletrisidade, husi lilin no mós ema mak sunu.

"Ida ne'e ami husik ba autoridade kompetente mak tenke identifika", dehan Diretór Jerál Colegio Infante Sagres, Maliana, Pe. Norberto Soares hateten, liuhusi komunikadu ne'ebe tempotimor.com asesu, iha Sesta (28/2).

Lar nee iha dormitoriu haat. Dormitoriu tolu ba estudante Ensinu Sekundária no ida seluk ba profesora no staff internatu nian, ahi han lalais loos tanba sasan sira ne'ebé iha laran, mesak sasán sira ne'ebe fasil atu ahi han.

Fatin nee ahi han la to'o minutu 10, internatu ne'e kuaaze atu hotu kedan. Bombeiros sira mos la konsege salva, tanba ahi han lais.

Estudate ka larista sira ne'ebé hela iha lár Colegio Infante de Sagres Maliana iha 117. Sira ne'ebé afetadumaterialmente no psikolojikamamente iha estudate 92.

Iha momentu akontesimentu, estudante sira maioria iha hotu li'ur. Na'in 3 de'it mak iha dormitoriu laran, maibé konsege salva aan husi inséndiu ne'e.

Ho akontesimentu ne'e, Diocese Maliana evakua hotu larista sira ne'e ba hela iha BTC-Betania Training Center (Camara Antigo Diocese Maliana). Ekipa formadora tau matan hela ba sira nia nesesidade bázika hotu.

Inséndiu ne'e rezulta lár ho medida metru 40 vezes 12 mutuk, inklui kama andar 50 no armari 50. Ahi han mohu mos estudante sira nia ropa no sasán sira seluk iha lár, inklui mós kadernu no dokumentu.

Pe. Norberto husu ba parte hotu liuliu ba inan-aman sira atu labele pániku ho situasaun ne'e, tanba Dioseze Maliana sei buka meius hotu atu bele ultrapassa situasaun ne'e.(*)