"Hau hatete ba Prezidente, se aban ka bainrua hasoru Primeiru Ministru hato'o ami-nia difikuldade hirak ne'e para forsa bele kumpre didi'ak nia misaun," dehan nia, iha Palásiu Prezidensiál, Bairru-Pité, Kuarta (11/3).
Lere akresenta, FALINTIL-FDTL reforsa ona seguransa iha fronteira ne'ebé antes ne'e seksaun ida (membru F-FDTL nain hitu) agora aumenta pelotaun ida-ida (kompostu husi EDTL nain 35 kada pelotaun iha seksaun hat) hanesan Postu Tiliomar, Manduki ho Tunu bibi.
"Virus Corona mós bele tama husi fronteira. Corona Virus nee ita iha Dili mak tauk mas ema iha foho ne'ebá la hatene saida mak Corona. Ita buka meuis ba situasaun hirak ne'e," hatutan Lere.
Iha fatin hanesan, Ministru Defeza no Interiór interinu, Filomino Paixão hateten, iha tinan kotuk Ministériu Defeza hameno ona transporte tátiku.
"Tinan kotuk ita hameno transporte tátiku sanulu, espera fulan-Marsu too inísiu Abríl 2020, para mai reforsa tan iha fronteira nian mobilidade ba ita-nia forsa sira," dehan Paixão.
Antes ne'e, Xefe Estadu rasik informa kondisaun ne'ebé institusaun FALINTIL-FDTL hasoru ligadu ho operasional kareta ne'ebé durante ne'e FALINTIL-FDTL uza inklui lojistika. (*)