PNTL: Maske TL Livre Ona husi Covid-19, Labele Koko Tama Ilegal mai TL

Komandante Jeral PNTL, Komisariu Faustino da Costa ko'alia ho Jornalista sira hafoin hasoru malu Prezidente da Republika, Dr. Francisco Guterres Lu Olo iha palasiu Prezidensial, Dili (14/5) Komandante Jeral PNTL, Komisariu Faustino da Costa ko'alia ho Jornalista sira hafoin hasoru malu Prezidente da Republika, Dr. Francisco Guterres Lu Olo iha palasiu Prezidensial, Dili (14/5) Foto Isac Oliviera

Tempotimor (Dili)-Maske Timor-Leste livre husi Corona Virus Deasses 2019 (Covid-19) maibé Polisia Nasionál Timor-Leste (PNTL) sei la husik livre fronteira rai-maran entre Timor-Leste ho Indonezia.

Komandante Jerál PNTL Komisáriu Faustino da Costa hatete, maske Timor-Leste bele livre husi surtu Covid-19, maibé PNTL sei la husik livre fronteira.

"Forsa defeza no Polisia Nasionál Timor-Leste hala'o serbisu iha fronteira atu asegura, tanba iha momentu ida ne'ebé Timor-Leste festa hela, buat ruma bele mosu, entaun uluk kedas ami dehan, fronteira ne'ebá ne'e zero toleransia ba ema ne'ebé tenta tama ilegalmente," dehan Komisáriu Faustino iha Palásiu Prezidensiál Bairu-pite, Kinta (14/05).

 

VIDEO PUBLISIDADE APELU HUSI PM TAUR APLAUS BA FRONT LINE

 

 

Komisariu ne'e afirma, maske nasaun livre ona husi infeksaun corona virus, maibé ida ne'e la'ós dalan atu PNTL husik fronteira.

"Se ita-nia nasaun Covid-19 tuun ona, la signifika ami mós husik livre fronteira, ami sei akompaña tanba ita-nia nasaun viziñu númeru afetadu sa'e beibeik inklui númeru mate mós sa'e. Seráke ita husik ita-nia fronteira livre?," dehan Faustino.

 

PUBLISIDADE

 

Komandante ne'e mós husu ba sidadaun sira ne'ebé atu tama mai teritóriu nasionál atu tama liu husi dalan legál ne'ebé governu autoriza, la'ós tenta liu fali husi dalan laho.

“Ba sidadaun sira keta koko atu fasilita sira iha sorin tama mai Timor-Leste, se ita mak tenta fasilita ema, ne'e konsekuénsia ita rasik mak lori."

Komandante Faustino mós husu ba membru sira ne'ebé mak serbisu iha fronteira, atu hala'o serbisu bazeia ba orden ne'ebé komandu fó sai katak zero toleransia ba kualker sidadaun ne'ebé tenta atu hakur ho ilegalmente tama Timor Leste,  atu nune'e labele iha tan kontaminasaun, tanba númeru Covid-19 tuun ona.

 

PUBLISIDADE

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.