Xefe Estadu Maior F-FDTL Maijor Jeneral Lere Anan Timur hatete, tuir informasaun ne’ebé nia parte simu, semana ida kuaze ro 200 mak tama iha tasi Timor hodi halo atividade peska illegal.

“Agora iha tasi mane ne'ebá ne'e iha ro rua ka tolu dezde Abril to'o agora ne'e nafatin iha ne'ebá hodi kail ikan ilegál," dehan Lere hafoin hasoru malu ho Prezidente Repúblika Francisco Guterres Lú Olo iha Palásiu Prezidensiál Bairu-pite Dili, Kuarta (10/06).

Maske nune’e, Lere dehan, Timor-Leste labele halo buat ida tanba laiha ro atu bele halo netik intervensaun.

"Agora ema iha tasi laran, ita atu halo nusa, nani de'it mós la di'ak, dala-ruma nani to'o ne'ebá ema sona mate tiha ita, ita ba ho ro mós kuitadu, ne'e ita-nia governu mak hatene."

Aleinde peska illegal, Lere dehan, iha mós krime organizadu iha tasi laran.

"Ne'e mak ha'u dehan, peska ilegál iha rai ne'e iha beibeik, maibé krime organizadu mós iha tasi laran nafatin, tanba ita laiha kondisaun," katak nia.

Maske iha dezafiu, maibé Maijor Jeneral ne’e mós hein katak Orsamentu Jerál Estadu (OJE) ne'ebé sei deskute iha tempu badak preve mós osan ba sosa ro.

"Mais ita hein katak orsamentu estadu nian ba 2020 no 2021 nian ne'ebé sei deskute iha tempu badak, ita hein katak governu iha osan par hodi hola ro, par halo patrollamentu ba ita-nia tasi Timor parte norte no sul," nia dehan.