Tuir-nia, prezensa UPM iha fronteira Tasi Timor durante ne'e limitadu tebes tanba kondisaun ró lansa ne'ebe atu fasilita sira ba-mai ne'e ladún di'ak ona.
Ne'e duni, solusaun ba kestaun ne'e nia hatete, di'ak liu governu sosa tan ró lansa ida hodi fasilita Unidade Polisia Marítima atu bele utiliza hala'o operasaun hodi prevene sasán ilegál tama mai Timor-Leste.
"Primeiru maka prosesu kontrola ba fronteira tasi timor nian, governu presiza sosa tan ró lansa ida, atu nune'e fasilita prosesu patrullamentu ba sasán ilegál sira iha fronteira tasi timor," dehan Deputadu Bankada FRETILIN, iha intervensaun plenária PN, Segunda (13/7).
Nia dehan, daudauk ne'e UPM iha ró boot ida maibé kondisaun ladún di'ak ona, tanba ne'e difikulta polisia sira nia atividade patrullamentu hodi kontrola movimentu ilegál sira iha liña tasi timor nian.
"Tuir informsaun UPM mos iha ro boot ida kona-ba atu hala'o operasaun, maibe ró ne'e nia kondisaun ladún di'ak ona, bainhira atu halo manutensaun ba ró ne'e presiza osan to'o rihun US$ 100 mak foin bele," deklara nia.
Hataan ba kestaun ne'e, Ministru Asuntu Parlamentár no Komunikasaun Sosiál, Francisco Jerónimo hateten, nia parte sei hato'o kesaun ne'e ba ministériu defeza ne'ebe tutela hodi bele rezolve asuntu seguransa ba Tasi timor nian.
"Kestaun seluk ne'ebe deputadu sira hato'o ami sei submete ba ministériu relavante sira atu bele tau konsiderasaun," tenik nia. (*)