Ai-Tahan Matak Hakarak Konsentra Massa Prepara Petisaun, PNTL La Fó Lisensa

Antonio Ai Tahan Matak ko'alia ba jornalista sira iha Kuartel Jeral PNTL Dili (16/7) Antonio Ai Tahan Matak ko'alia ba jornalista sira iha Kuartel Jeral PNTL Dili (16/7) Foto Tempo Timor

Tempotimor (Dili) - Grupu Rezisténsia Nasionál Defende Justisa Konstituisaun (RNDJK) sei konsentra massa husi kada bairru hodi prepara petisaun ba Prezidente Repúblika, Francisco Guteres Lú Olo.


Reprezenta RNDJK, António Ai-Tahan Matak hateten, konsentrasaun husi kada bairru iha sede RNDJK, Bairru Formoza, Sesta (17/7), atu rekolla ideia hotu-hotu atu tau hamutuk iha petisaun hodi hato'o ba Prezidente Repúblika.

"La'ós atu halo manifestasaun maibé konsentrasaun ne'e sira atu aprezenta opiniaun ne'ebe sira la konkorda desizaun Prezidente Repúblika nian", dehan nia, hafoin hasoru-malu Porta-vós Komandu PNTL, Superintendente Xefe Arnaldo de Araújo, iha Komandu Jerál PNTL, Kaikoli, Kinta (16/07).

Ai-Tahan Matak karik seidauk fiksa kona-ba númeru ema ne'ebé atu partisipa reuniaun ne'e,  maibé iha konsentrasaun ne'e maka foin bele hatene hodi informa ba parte seguransa.

Tuir nia, inisiativa RNDJK halo preparasaun ba petisaun ne'ebe atu hato'o ba Prezidente Repúblika, tanba ema seluk la satisfas ho desizaun ne'ebé partidu ho kadeira barak la ukun no kadera uitoan ukun fali.

"Massa rekere nia direitu tanba ho kadeira 23 no 21 la ukun maibé, kadeira 5 mak ukun fali entaun ema la 'puas', tanba lei la hakerek kadeira 5 kuandu viabiliza ne'e bolu maioria parlamentár no menoria governu ne'e mak naran viabiliza, kuandu koligasaun formál entaun bolu IX Governu, la'os bolu fali VIII Governu", tenik Nia

Iha Fatin hanesan, Porta-vós Komandu PNTL, Suprientendente Xefe Arnaldo de Araújo hatete, ekipa RNDJK mai duni atu ko'alia kona-ba atividade ne'ebe sira atu hala'o iha tempu tuir mai.

"Ida ne'e obrigasaun polisia nian bolu sira mai atu bele hato'o sira nia objetivu ba PNTL kona-ba saida mak sira hakarak atu hala'o", tenik nia.

Maski nune'e, atividade ne'e seidauk hetan lisensa tanba parte PNTL presiza prepara ekipa hodi haree ba kestaun seguransa nian. 

"Atividade ne'ebe sira atu halo, aban, Sesta (17/7) seidauk halo, parese iha tempu oin mak sira halo tanba buat hotu presiza aserta ho PNTL, atu haree ba estabilidade labele mosu ema balun ne'ebé hakarak destrui", dehan Arnaldo.

Nia mos dehan, parte PNTL atu fo autorizasaun ba RNDJK hodi hala'o atividade ne'e iha fali enkontru tuir mai mak bele hatene loloos. (*)

Rate this item
(0 votes)
Last modified on Thursday, 16 July 2020 16:53
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.