Tuir dadus ne’ebé SEP iha, iha tinan 1999, stock ikan iha tasi Timor-Leste nian iha 638.855. Númeru ne’e sa’e to’o tonelada 718.900 iha tinan 2011.
Maske TL iha rekursu, maibé, SEP Elidio de Araujo hatete, hahú husi tinan 2015 mak foin iha explorasaun ho legalmente.
"Iha tinan 1999, Timor-Leste iha stock ikan hamutuk tonelada 638.855, maibé liu tiha tinan balun, to'o iha tinan 2011, ita-nia ikan nia stock aumenta sa'e ba tonelada 718.900. Maibé husi númeru ne'ebé iha, hahú husi 2015 to'o 2020, ikan sira ne'ebé legalmente explora ona foin mak pursentu 2, pur-volta tonelada 15.307," dehan Elidio ba jornalista sira salaun Tower Fatuhada, Dili, Tersa (21/07).
Nia dehan, tanba foin explora de'it pursentu 2 mak fó mós konsekuénsia ba kontribuisaun reseita husi peskas nian ba kofre estadu.
"Husin 2005 to'o 2020 halo kobrasa ba tarifas ikan hetan de'it rihun $955.107," dehan SEP.
Elidio dehan, durante tinan 15 nia laran, peska illegal mak aproveita barak liu ikan iha tasi Timor.
"Ema estranjéiru ne'ebé na'ok ona ikan Timor-Leste nian hamutuk tonelada 147.975, signifika peska ilegál sira na'ok ikan iha tasi Timor-Leste aas tebes, kuanze pursentu 20.58."
Konsekuénsia husi peska ilegál ne'e, iha tinan rua nia laran de’it, 2013 to’o 2014, ekonomikamente estadu TL lakon osan hamutuk tokon $214.
“Signifika Timor-Leste lakon ikan tonelada 30.600 kada tinan,” dehan nia.