"Ita mai iha Dili ne'e, ita hakarak moris di'ak.  Rama ambon ne'e la'ós fatin iha Dili. La'ós rama ambon de'it, maibé ba krime seluk mós. tanba ne'e hakarak halo problema, Dili laiha fatin ba ida ne'e," dehan Komandante PNTL Munisípiu Dili, Superentedente Xefe Henrique da Costa, ba jornalista sira, iha Kampus UNPAZ, Manleuana, Dili, (22/07).

Nia dehan, daudaun ne'e komandu foku ba autór rama ambon sira, maibé ba mós krime seluk, entaun komandu koloka ho polisia tránzitu sira, Ofisiál Polísia Suku (OPS) mós servisu hodi koordena ho autoriedade lokál sira para halo identifikasaun ba autór krime sira.

"Ita servisu hamutuk ho autoriedade lokál sira para ita identifika autór sira ne'ebé kontinua halo rama ambon," nia dehan.

Henrique dehan, komunidade ne'ebé kontinua pániku ne'e normal, tanba ema moris kuandu iha problema sempre mosu pániku.

"Krime mosu, tanba problema sosiál, ne'ebé la signifika PNTL iha ona entaun halakon ona krime, ita atu halakon krime ne'e susar, maibé polisia nafatin esforsu para prevene krime sira ne'ebé kontinua iha," dehan nia. (*)