Tuir informasaun husi parte seguransa, Timor-oan ne’ebé halai tama iha aeroportu Komoro ne’e ho inisial DM, mai husi Fatubesi, Munisipiu Ermera.
Komandante Daruak PNTL Dili Superententedente Asistente Euclides Belo hatete, tuir identifikasaun inisiu, Timor-oan ho insial DM ne’ebé halai tama iha aeroportu sofre moras mental.
"Joven ida ho naran (inisial) DM husi Fatubesi, Ermera, halai tama ba aeroportu liu husi fatin chegada nian, depois nia halai liu kedas ba iha fatin ne'ebé atu hakat sa'e ba eskada aviaun nian," informa Euclides ba www.tempotimor.com iha nia knaar fatin, Kaikoli, Tersa (28/07).
Bainhira to’o iha fatin sa’e eskada aviaun nian, Euclides dehan, pesoal seguransa husi embaixada Estadu Unidus Amerika konsege kaptura DM.
"Pesoál ne'e hetan kapurasaun husi pesoál seguransa ida husi embaixada Amerika nian, depois lori mai komunika kedas ba ita-nia pesoál sira ne'ebé iha ne'ebá, ne'ebé apoiu servisu husi Unidade Patrollamentu Fonteira (UPF) ne'ebé koloka iha aeroportu, depois foti kedas nia informasaun, depois hetan katak sidadaun ne'e moras mental uitoan," dehan nia.
Daudauk ne’e, nia dehan, DM iha ona eskuadra polisia Don Aleixo hodi bele konfirma ho parte saúde atu haree gravidade husi moras ne’ebé nia sofre.
Tuir nia, DM konsege halai tama ba aeroportu laran tanba pesoál seguransa sira ne’ebé kontrolu aeroportu halo hela seguransa ba familia sira ne'ebé ba hein familia balun husi estranjeiru.
“Entaun DM aproveita tama ba aeroportu to'o iha fatin chegada ninian,” dehan nia.
Maske nune’e, nia dehan, nia parte kordena ona ho UPF ne'ebé hola parte iha seguransa aeroportu nian atu reforsa, inklui mós sei iha seksaun ida ne'ebé apoiu atu tau-matan di'ak liu tán ba pasajeiru sira.
Entretantu, molok ne’e, iha fatin hanesan, Timor-oan ida husi munisipiu Ermera, halai tama ho motor ba fatin aviaun tuun no koko atu xoke aviaun.