Ministru Defeza no Seguransa (MDS) Filomeno da Paixão de Jesus informa, Timor-Leste sei simu aviaun patrollamentu husi Estadu Unidus Amerika ne'ebé molok ne'e halo ona konkordansia.

"Kona-ba aviasaun, governu Amerikanu mós prontu ona fó avioneta ida ba Timor-Leste par halo vizilánsia maritime, tantu kosta sul no norte nian," dehan Paixão ba jornalista sira iha Palásiu Prezidensiál Bairu-pite, Tersa (04/08).

Aleinde fó aviaun ba TL, nia hatutan, EUA mós prontu atu dezenvolve aeroportu Baukau.

"Estadu unidus Amerika prontu par atu dezenvolve Aeroportu Munisípiu Baukau ba aeroportu ida polivalente, bele uza ba fins hotu-hotu. Ba fins militar nian liu ba atu fó apoiu umanitáriu ba populasaun, la'ós par ba funu nian," dehan nia.