"Ho Australia, hanesan ita-boot sira hatene, ita hein guardian klase, guardian patrulla ne'ebé sei mai par hola parte ita-nia partilla, entaun iha Hera, governu Australia mós kompromete atu halo ponte kais no portu Hera nian kuaze metade governu Australia sei apoiu, no metade seluk ita mak sei investe," dehan Paixão ba jornalista sira iha Palásiu Prezidensiál bairu-pite, Segunda (04/08).
Aleinde ne’e, nia informa mós katak, Australia sei fó mós doasaun ró patrollamentu rua ba Timor-Leste.
"Australia sei fó doasaun Ró rua ba ita, entaun ita mós iha obrigasaun atu hola tan ró rua."
Nia hatete mós katak, molok ne’e nia parte aprezenta ona proposta atu sosa tan ro ne’ebé boot liu ro ne’ebé Australia fó.
"Tuir ami-nia proposta ne'ebé hasa'e ba, ita tenke iha ró boot ida, liu fali ida Australia fó ne'e, par ba lojístika nian, entaun Australia apoiu ne'e mai tan, ita hamutuk ró haat, tolu ba patrollamentu no ida ba lojístika, entaun sira seluk ne'ebé iha ne'e, pasiénsia ita tau ba lelaun," Ministru ne’e hatete.
Antes ne'e, iha IV Governu Konstitusional nia Ukun, liu husi Konsellu Ministru Extra Ordinaria deside single source projeitu konstrusaun Portu Hera ba kompania Lifese Engineering Pty Ltd, husi Sydney Australia ne'ebe ikus mai halakon saugate osan estadu ho montante US$8.4 Milloens.