Lere hatete, maske politiku-nain balun konkorda ho asaun neebé Angela Freitas halo, maibé Lere sei la fó ulun, no sei halo intervensaun bainhira Angela lidera duni grupu halo manifestasaun.
"Ha'u mak nunka konkorda Ángela Freitas atu xefia manifestasaun, ha'u la konkorda," dehan Lere iha nia knaar fatin Fatuhada, Dili, Sesta (04/09).
Lere afirma, bele iha polítiku balun konkorda hodi Ángela Freitas lidera demostrasaun, maibé Lere kontinua la fó ulun, tanba iha ona lisaun rua iha tempu liu ba.
"Polítiku sira seluk bele konkorda mós ha'u la konkorda, tanba lisaun rua ne'ebé nia (Angela) halo ne'e ha'u aprende ona. Laiha justisa bainhira Alfredo Reineldo mate, suku nakles mate, polísia na'in lima mate, ema laiha justisa, Angela livre hela de'it, Mauk Moruk mate Ángela livre hela de'it. Agora situasaun rungu-ranga, nia fila husi Australia atu mai halo tan demostrasaun ne'ebé uza ha'u-nia maun Xanana nia naran no nia fotográfia," dehan Lere.
Tan nee, Lere afirma, nia sei la fó dalan ba Ángela atu halo demostrasaun, tanba molok nee Maijor Alfredo Reinaldo no Mauk Moruk mate tanba asesoria husi Ángela, no too ohin seidauk iha justisa.
Ho nune'e, nia dehan, nuudar Komandante F-FDTL nia lakohi situasaun rua ne'e akontese dala ida tan iha Timor-Leste.(*)