Tuir Lere, nu'udar portavoz RNDJ-KRDTL, Angela molok ne'e deklara katak iha envolvimentu membru F-FDTL no PNTL, tan ne'e Lere sei husu responsabilidade ba Ángela Freitas.
"Angela dehan militar sira envole iha ninia grupu, agora investigasaun komesa la'o, see mak envolve par ita koñese," dehan Lere iha Kuartel Jeneral Fatuhada, Sesta (04/09).
Lere dehan, ohin ka aban sei orienta membru F-FDTL ba Ángela nia rezidensia hodi husu lista membru militar no polisia ne'ebé envolve.
"Ha'u sei haruka ha'u-nia ema sira hodi ba ko'alia ho Ángela par husu señora fó lista membru sira nian ba ami par ami hatene, dala-ruma orsida, lae aban ne'e ba ona," dehan Lere.
Tuir nia, maske nia fó ona informasaun antes, maibé Angela labele halai husi TL tanba daudauk nee aviaun la halai ona.
"Angela agora la halai ona tanba aviaun la semo ona, nia atu halai ba iha ne'ebé, enkuntu problema ne'e la rezolve nia sei la sai husi Timor, só kuandu rezolve ona problema ne'e nia bele sai, tanba ne'e orsida ka aban ha'u-nia inspesaun jerál, J2, no ha'u-nia justisa mós ba ona, par husu lista naran ne'ebé envole iha laran," katak nia.
Lere mós subliña katak Ángela tenke fó membru sira-nia naran, se la fó, ema ruma tenke responsabliza ba áktu Ángela hodi hetan médida ne'ebé merese, tanba hafoer ema nia naran.(*)