Tuir Xefe Estadu Maiór Jerál F-FDTL Majór Jenerál Lere Anan Timur, tanba konsidera fatin Ângela Freitas nian ne'e risku, entaun militár tenke hola pozisaun.

"Kazu konkreta iha dia (1/9) ne'e Ângela deklara instituisaun rua hanesan F-FDTL no PNTL dala-ruma sei han malu, no Ângela mós dehan, demostrasaun ne'ebé sira halo atu hatún Prezidente Repúblika (PR) ne'e F-FDTL no PNTL iha hotu laran. Entaun ha'u konsidera ne'e zona risku, di'ak liu prevene duké basa rentos," dehan Lere, iha Kuartel Jerál Fatuhada, Sesta (4/9).

Lere afirma, iha 2006 mak iha surpeza, maibé agora la'ós surpreza ona.

"Objetivu patrollamentu atividade ne'e rotina nu'udar militár nian," katak Lere.

Parajem iha Ângela nia uma ne'e tanba atu halo ezersísiu iha kampu demokrásia no iha parte seluk mak área risku nian, maibé militár la baku ema ida, la serku no la ameasa ema ida. Sira hamriik de'it iha ne'ebá.

Entretantu, polítiku na'in ne'ebé kondena Jenerál Lere katak komete krime instigasaun, maibé Lere dehan seidauk ameasa ema ida.

"Se iha lei hodi proteje ema kriminozu sira, tanba saida mak ita labele proteje orgaun soberanu sira? Tanba Ângela nia intensaun hakarak hatun Prezidente Repúblika, Franscisco Guterres Lú Olo, ne'ebé veteranu tinan 24," nia tenik. (*)