Tuir Ministru Defeza no Seguransa (MDS), Filomeno da Paixão de Jesus hateten, atu reabilita aeroportu Baukau governu planu atu halo MoU ho Estadus Unidus Amérika (EUA) hakarak apoiu tokon US$ 10 ba reabilitasaun ne’e.
"Memorandum ne'ebé ita atu halo karik ho Amérika no Austrália ka ho kompañia privadu ka doadór seluk, oinsá maka bele dezenvolve ita-nia aeroportu iha Baukau, para halo kontrolu ba ita-nia seguransa marítima liuliu kosta súl," dehan nia, iha Palásiu Governu, Tersa (8/9).
Memorandu entre TL ho UEA no Austrália sei diskute hela kona-ba atu halo patrullamentu hamutuk iha kosta súl no ho UEA oinsá maka atu hadi'a aeroportu Baukau.
"Reabilitasaun aeroportu Baukau ne'e lalais liu, di'ak liu, tanba ita iha ona entendimentu ho Estadus Unidus Amérika, falta halo akordu para hotu hatene nia intensaun saida, mak governu rua ne'e presiza tuur hamutuk para halo aeroportu Baukau ne'e halo oinsá,” dehan Filomeno.
Nia hatutan, EUA hatete atu reabilita aeroportu Baukau ne'e kompeténsia governu TL nian, tanba ne'e atu halo modelu oinsá ne'e TL mak hatene, maibé EUA lakohi mete, maibé hakarak ajuda de'it F-FDTL.
Filomeno afirma, EUA apoiu ba F-FDTL hodi halo armazein iha aeroportu Baukau, nune'e bele apoiu umanitáriu ba populasaun no mós halo vijilánsia ba kosta súl.
Entretantu, orsamentu ne'ebé atu halo reabilitasaun ba aeroportu Baukau ne'e iha tokon US$ 10 ne'ebé oferta mai husi EUA.
Alende ne'e, Ministériu sira ne'ebé sei halo esforsu hodi asina MoU ho EUA no Austrália maka Ministériu Defeza no Seguransa no Ministériu Negósiu Estranjeiru no Kooperasaun. (*)