Portavoz Komandu Jerál PNTL Superintendente Xefe Arnaldo Araújo rekoñese katak membru PNTL ida mak tiru duni joven ida iha Tibar, tanba membru PNTL husi unidade Taks Force ne'e halo defeza ba nia an.
Portavoz ne'e konta, membru PNTL ne'e tiru, tanba grupu PSHT no IKS koko atu oho nia ho nia kolega sira.
"Membru PNTL ne'e husi Ermera atu ba hala'o serbisu iha munisípiu Likisa, maibé nia to'o iha dalan mosu akontesimentu tuda malu husi grupu rua ne'e, entaun nia mesak iha ne'ebá hodi atua, depois nia kolega na'in tolu seluk to'o tan hodi sira halo atuasaun, maibé sira mós hetan tuda husi grupu rua ne'e to'o balun kanek, depois sira dehan oho hotu Polísia sira ne'e, entaun ida ne'e mak sira halo defeza ba sira-nia aan mak hasai duni kilat ne'e hodi tiru, tanba ne'e ita sei hein prosesu investigasaun, labele duun see mak sala no see mak loos," dehan Arnaldo iha Komando Jeral PNTL, Kaikoli, Segunda (14/09).
Kona-ba konfrontu ne’e rasik, Arnaldo hatete, konfrontu ne’ebé envolve husi membru grupu PSHT no IKS ne’e rezulta ema na’in ida kanek no uma rua mak hetan estragus.
Ba suspeitu prinsipal sira, nia dehan, daudauk ne’e PNTL sei buka hela, hein katak tempu badak bele hatene ema na'in hira mak envolve.
Iha fatin seluk, Komandante Jerál PNTL Komisáriu Faustino da Costa hatete, prosesu investigasaun ba membru PNTL ne'ebé tiru joven ne'e la'o hela.
"Membru ne'ebé tiru ne'e iha ona ekipa ida ne'ebé halo identifikasaun ba kazu ne'e depois iha prosesu investigasaun hotu mak ha'u bele hato'o ba ita-boot sira," dehan nia.
