IKS-PSHT-KORK seidauk prienxe rekizitu reativasaun

Membru PSHT ba sa'e sabuk iha Atambua no Kefe Membru PSHT ba sa'e sabuk iha Atambua no Kefe Foto Arkivu

Tempotimor (Dili) - Organizasaun arte-marsiál ne'ebé antes ne'e governu suspende sira-nia atividade daudaun hatama ona dokumentu ba Komité Reguladora Arte-marsiál (KRAM) atu rejistu, maibé dokumentu ne'ebé submete seidauk prienxe rekizitu 18.

Sekretáriu Estadu Juventude no Desportu (SEJD), Abrão Saldanha hatete, organizasaun arte-marsiál Ikatan Keluarga Silat Putra Timor-Leste (IKS-PTL) Kera Sakti, Persaudaraan Setia Hati Terate (PSHT) no Klibur Oan Rai Klaran (KORK) daudaun hatama ona dokumentu ba rejistrasaun maibé seidauk kompletu.

"Arte-marsiál sira tuir rezolusaun governu nian atu revoga rezolusaun distintu ne'e, agora komesa rejistrasaun, sira hatama pedidu ba Komisaun Nasionál Regulador Arte-marsiál (KRAM) atu avalia sira nia dokumentu para rejista tuir dekretu Lei númeru 5/2015, kona-ba asosiasaun sira nian no prosesu ne'e sira avalia hela, iha ne'ebá IKS-PTL, PSHT no KORK mós hatama ona, depois avalia, adia prosesu kalendáriu fó tinan ida, se laiha presiza halo kompletu depois rejistu", dehan nia, iha edifísiu Ministériu Finansas, Aitarak-Laran, Segunda (21/09).

Nia esplika, organizasaun bele rejista maibé atu hala'o atividade konforme Lei númeru 5/2017, ne'ebé kona-ba arte-marsiál nia atividade no balun ne'ebé proibi.

"Balun proibi, entaun ami ko'alia ona ho organizasaun arte-marsiál atu hahú fali halo pakote lejizlasaun ba arte-marsiál ne'e rasik. Pakote ne'e inklui dekretu Lei sira ho lei de baze ba arte-marsiál, nune'e bele lori sira fila ba sosiedade buat ida, atividade ne'e buat seluk", dehan Abrão.

Abrão afirma, KRAM avalia dokumentu ba arte-marsiál sira atu rejistu bazeia ba kritériu 18.

"Dokumentu sira mai avalia tuir ida ne'e, se la prienxe fó hatene fila-fali ba sira para prienxe, prosesu ne'e sei la'o hela, la'ós ohin ba rejistu hotu kedas, maibé sei avalia ida-idak, se sira kumpre tiha rekizitu mak Sekretáriu Estadu Juventude no Desportu halo rekomendasaun ba notariadu para bele rejistu", tenik nia.

Nune'e, SEJD nafatin husu ba organizasaun arte-marsiál, IKS-PTL, PSHT no KORK atu halo kompleta dokumentu hafoin bele rejistu. (*) 

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.