Tuir Primeiru Ministru (PM) Taur Matan Ruak katak, dadaun ne'e ema barak mak lakohi kumpri ona regas nune'e ultrapasa bei-beik iha fronteira rai ho ilegalmente.
"Agora ne'e pasajem ilegál barak loos, liu-liu ita-nia oan sira ne'ebé tama-sai, entaun ida ne'e preokupasaun governu nian, ohin ami mai hato'o ba xefe estadu para médida saida mak presiza foti no ba oin kontrola maka'as liután," dehan PM Taur iha Palásiu Prezidensiál bairru-pite, Kinta (24/9).
Nia afirma, atu prevene sidadaun tama-sai ilegál iha fronteira, tenke reforsa postu seguransa sira iha fronteira.
"Presiza reforsa iha postu sira no koordena ho ita-nia nasaun viziñu Indonézia, para impede ita-nia sidadaun sira ne'ebé halo pasajem ilegál," katak Taur.
Eis fitun rua ne'e afirma, presiza duni koordenasaun ho Indonézia, tanba sidadaun TL ba sira sira, entaun horsida Indonézia fomenta, tanba ne'e tenke buka d alan para koopera asuntu ne'e ho di'ak liután.
Xefe governu ne'e akresenta, alende husi kooperasaun ho Indonézia, tenke sensibiliza mós sidadaun sira hodi kompriende regras.
"Sensibiliza ba sira katak, ne'e ita-nia regras, tenke kumpri, tanba la'ós di'ak ba governu nian de'it, maibé ba sidadaun hotu. Sa tan agora moras covid, se sira balun la'o mak hetan moras depois mai subar de'it, ba sira-nia uma, mak iha moras sei da'et ba feen, oan no inan-aman, depois familia uma laran ita haree kasian," nia dehan.
Matan Ruak subliña, bainhira hetan susar ona, pois fó sala ba estadu, maibé la konxiente katak ne'e konsekuénsia husi sira-nia hahalok.
Tanba ne'e ajente seguransa sira tenke servisu maka'as no labele permite nafatin hodi sidadaun sira tama sai ilegál.