Tuir informasaun ne’ebé Patrocino hetan, iha Sabadu (03/10), bainhira motor ida xoke labarik ida, funsionariu SAS ida, Augosto, hakat hodi fó lalais asistensia ba labarik ne’e. Maibé, ikus mai, pesoal PNTL sira baku fali Augosto.
"Iha akontesimentu ida violasaun husi membru polisia sira ba sidadaun ida naran Augosto iha same,” informa nia iha PN, Tersa (06/10).
Nia konta, hafoin motor xoke labarik ne’e, pesoal PNTL ne’ebé la uza farda mai atu foti dadus no Augosto husu ba pesoal ne’e atu tau-matan uluk ba labarik hafoin foti dadus.
“Depois polisia ne'e ameasa katak ‘o la hatene ha’u (polisia) tranzitu?’, ‘Sim ha’u hatene ita tanzitu, mais ha’u agora mai fó asistente hela ba labarik ne'e, ne'ebe ita haree lai ida ne'e’," dehan Patrocino hodi repete konversasaun entre pesoal PNTL ho funsionariu SAS.
Maske mosu de’it diskusaun kiik, maibé Patrocino dehan, pesoal PNTL ne’e foti telefone hodi kontatu ba ninia komandante no informa katak populasaun baku polisia.
“Entaun komandu polisia haruka kedas ekipa ida tuun ba, la hatene husu tan informasaun oinsa, baku fali ema ida atu fó asistente ba labarik ne'e to'o tasak didi’ak, hada’u tan nia motor, hada’u tan nia telefone, hotu lori ema ne'e ba detein tan 72 oras iha sela," dehan nia.
Relasiona ho kazu ne’e, deputadu ne’e husu ba Ministériu Interior atu tau atensaun.
“Se bele ita-nia membru polisia sira, ita apresia sira-nia servisu sira ne'e, maibé sira tenke servisu mós ho profisional, par ita-nia povu labele sai fali alvu ba servisu sira ne'ebé la profisional," dehan nia.
Entretantu ba preokupasun ne'e, Ministru Interior no atual Primeiru Ministru Taur Matan Ruak rejista ona maibé seidauk fó resposta.