Xefe Estadu Maiór Jerál F-FDTL Maijór Jenerál Lere Anan Timur katak, membru sira aprende ona, maibé governu la prepara kondisaun, entaun komandu haruka sira ba ke'e fali rai.
"Kona-ba forsa aero ne'e la'ós ha'u mak haruka ba, maibé ne'e planu governu nian, hodi haruka ema na'in 10 ba Filipina hodi eskola kona-ba pilotu, mais ita ne'e hanesan ne'e, ita seidauk iha kondisaun, ita prepara uluk ona ema, ne'e di'ak, maibé governu laiha planu entaun haruka ema ba tuir tiha buat ne'e, maibé mai fali sira ba fali ke'e rai," dehan Jenerál Lere Anan Timur iha Palásiu Prezidensiál bairru-pite, Kuarta (14/10).
Nia dehan, membru sira ne'e aprende tiha ona, maibé mai fali la servisu tuir área ne'ebé aprende entaun dalaruma iha problema ho komandu sira.
"Sira iha razaun duni, tanba ami ba hasai kursu kona-ba pilotu, agora mai ke'e fali rai," nia tenik.
Lere afirma, sorti membru sira ne'e bele aplika oituan tamba apoiu husi Timor oan Lorenço Atauru mak oferese netik avioneta kiik ida hodi membru sira bele halimar.
"Tuir informasaun katak iha marsu tinan oin, amerikanu sira atu fó tan aviaun kiik-oan ida, para ita bele treinu, maibé governu labele minimiza ita-nia rekursu umanu, tanba iha komponente Navál, Infantaria no Engeñaria, ita iha ema matenek barak, la'ós hanesan nasaun seluk, maibé ita mós bele," katak Lere.