Iha Kuarta (13/10) Komando PNTL Dili realiza sorumutuk ho diretór eskola sira hamutuk 29 iha munisípiu Díli nian hodi introduz programa Polísia Vizita Eskola liuhosi sensibilizasaun lei ba estudante sira atu bele komprende nune'e, bele evita konflitu akontese iha eskola.
Komandante PNTL Díli, Superintendente Xefe Henriques da Costa esplika, objetivu husi sorumutuk ne'ebé KMD hala'o, atu introduz programa Polísia Vizita ba Eskola ba diretór sira hodi prevene konflitu iha eskola.
Nia dehan, iha programa Polísia Vízita Ba Eskola, nia intensaun atu involve ekipa sira husi parte tranzitu nian, parte investigasaun, parte polísia komunitária, halo vizíta ba iha eskola hodi halo sensibilizasaun ka fahe informasaun ba iha ita nia estudante sira.
"Tanba ne'e maka ita konvida sira mai depois ita hodi introduz ita nia programa ne'e, para atu nune'e sira bele prepara estudante sira iha ida-idak nia eskola, atu ita bele ba fahe informasaun ka sosibilizasaun leis ba iha estudante sira", hatete Komandante PNTL munisípiu Díli, Superintendente Xefi, Henriques da Costa ba jornalísta sira iha PNTL Kaikoli, kuarta (13/10).
Nia esplika, programa polísia vizita eskola nu'udár programa segundu, tanba prímeiru maka Programa Polísia ba Kampus ne'ebé remata ona iha fulan Setembru kotuk.
Liuhosi programa Polísia Vízita Eakola, atu bele halo prevensaun ba kríme sira no eduka mós estudante sira, tanba dala-ruma balu laiha informasaun no balu lahatene.
Tuir nia haree, iha estudante balu dala-ruma sa'e motor , ema ema na'in-tolu bele sa'e dala-ida, balu motor la presiza dokumentus, tanba ne'e maka kada loron komandu halo pasa-revísta, sempre halo aprénsaun ba motor husi 20 to'o 30.
"Ida ne'e maka ita nia intensaun hodi halo vizita ba iha eskola ne'e, ida parte husi prevensaun kríme ninian, ida mós atu eduka sira parte ida sira bele hatene", dehan nia.
Nia hatete, ba eskola sira ne'ebé deskonfia sempre mosu konflitu, ba futuru KMD sei koloka ofisial polísia ba eskola para atu nune'e sira bele hala'o servisu besik kedas iha eskola.
Diretór Eskola Sekundária Jerál Katólika Sagrada Coraçăo de Jesus Bekora, Pe. Domingos Godinho hato'o agradese ba maluk Komando Polísia munisípiu Díli tanba konvida ona sira husi eskola Sekundáriu Jerál ho Tékniku Vokasionál sira ba hamutuk hodi koalia kona-ba Programa Polísia Vízita Eskola.
"Ita hatene katak, iha ida-idak nia eskola iha alunus barak, entaun ida ne'e importante tebes ba relasaun servisu hamutuk entre eskola ho polísia sira hodi bele kontrola estudante sira", dehan nia.
Tuir nia, durante ne'e iha estudante balu nakar-teen, balu Inan-aman koalia iha uma-laran la rona, soe mai eskola, dalaruma profesor sira koalia, sira la rona mós, entaun ida ne'e momentu ida ne'ebé di'ak tebes atu servisu hamutuk ho polísia hodi halo sensibilizasaun ba lei iha programa vizita ba eskola, hodi transforma Dili sai sidade hakmatek.
"Iha estudante balu ne'ebé mak uza farda eskola lao pasiar iha dalan, entaun polisia bele haree mós ba ida ne'e, bele kaptura sira lori ba entrega iha eskola, depois eskola sei bolu Inan-Aman sira fó atensaun", hatete nia.
Entretantu, iha enkontru ne'e, partisipa husi eskola 29 iha munisípiu Díli nian, inklui postu Metinaro, Hera, no Ataúro hodi koalia kona-ba programa Polísia Ba Eskola.
