Ho situasaun ne'e, Komandante Polísia Unidade Tránzitu Munisípiu Díli, Inspetór Polísia Domingos Sarmento Gama husu ba Governu, atu kria lei ida, hodi regula movimentu kareta kontentór sira-nia oráriu operasaun, iha kapitál Díli.
"Karik bele husu ba governu atu hamosu lei ruma ka dekretu lei ruma, atu bele regulariza kontentór sira ou kamioneta boot sira ne'e, hosi roda-neen to'o ba roda-sanulu, atu movimentu labele impede fali iha oras servisu, hodi hamosu asidentes barak", hatete Komandante Unidade Tránzitu, Inspetór Polísia Domingos Sarmento Gama ba jornalísta sira, iha nia kna'ar fatin Caicoli, segunda (19/10).
Nia hatete, durante ne'e, akontese asidente barak liu mak, entre motor ho kareta kontentór boot sira, tanbá operasaun kareta kontentór iha kapitál Díli, la tuir oráriu.
Maske nune'e, antes ne'e, parte PNTL Unidade Tránzitu halo ona koordenasaun ho Diretór Diresaun Nasionál Transporte Terrestre (DNTT), Atu nune'e, ba futuru hamosu fali despaixu ruma, hodi regulariza movimentu kontentór sira ne'e, hodi halo oráriu operasionais.
"Tanba asidentes barak liu involve motor ho kareta kontentór sira", informa nia.