“Governu tenke aloka orsamentu ba rekrutamentu, tanba tinan ida ne’e tenke halo tanba tarde ona, pelumenus fulan Agostu ba oin tenke hahú prosesu rekrutamentu para iha 2020 ne’e rekrutamentu inkorpora ne’e tenke la’o”, dehan nia, Palásiu Prezidensiál Bairru-Pité, Kuarta (24/4).

Entretantu, liga ba deklarasaun Ministru Defeza no Seguransa, Filomeno Paixão katak, membru F-FDTL sei muda ba halo servisu membru Polisia Nasional Timor-Leste (PNTL) nian, Jeneral Lere konkorda tanba servisu militar nian laiha obrigatóriu.

“Há’u kompriende pontu devista ministru defeza nian no há’u konkorda tanba lei servisu militar nian ne’e la’os obrigatóriu ne’ebé ita bele dehan kontratadu ka voluntáriu deit durante tinan hitu, tanba tama ba sarjentu tenke konkore no prinxe kriteira mak bele tama ba faze permanente to’o tinan neenulu hafoin reforma, mas soldadu sira ne’e ba iha ne’ebé”, tenik Lere

Nia hatutan, duke ghalo duplikasaun orsamentu ba rekrutamentu membro F-FDTL no PNTL durante tinan hitu ne’e, diak liu soldadu sira ne’ebé iha tina hitu ona ne’e transita deit ba polísia nasional.

Vantajem husi polítika ne’e mak la halo duplikasaun ba orsamentu, konfiansa moos entre instituisaun rua ne’e metin no bele garante estabilidade.