Portavoz Komandu Jerál PNTL Superintendente xefe, Arnaldo de Araújo, hateten PNTL sei halo operasaun ba bairu sira hodi halo kapturasaun ba ema ne'ebé tiru fugetes tanba hahalok ne’e bele halo komunidade hakfodak iha tempu kalan.
"Husu ba komunidade no alin kiik-oan sira nomós inan-aman sira, atu evita oan sira hodi labele sunu fugetes, tanba polísia sei halo patrullamentu ba bairu-bairu ka fatin sira ne'ebé Polísia deskonfia katak iha área refere faan ka sunu fugetes, entaun ba ida ne'e PNTL sei halo atuasaun ne'ebé rigorozu no sériu," Arnaldo de Araújo hateten ba jornalista iha Kaikoli, Segunda (23/11).
Nia mós afirma, PNTL sei halo atuasaun ba ema ne'ebé faan fugetes, bainhira seidauk hetan autorizasaun husi Ministériu Turizmu Komérsiu no Indústria (MTKI).
"Hanesan tinan-tinan PNTL halo, tanba ne'e husu ba negosiante sira ne'ebé faan paison, di'ak liu lalika faan, tanba ita seidauk hetan autorizasaun ida husi MTKI, tanba kada tinan turizmu mak autoriza, maibé se dehan labele PNTL la'o tuir no ezekuta ordem," Arnaldo alrama.
Komandante ne'e mós husu ba komunidade iha fronteira, atu labele fasilita malu hosi tama iha teritóriu Indonézia nian hodi hola fugetes, tanba moras Covid-19 kontinua eziste.
"Husi fugetes ne'e bele lori moras ba ita, tanba ita ba sosa iha ema-nia rai, iha ne'ebá moras iha hela, ita ba mak daet ba ita, konserteza sei daet tutan, depois fugetes ne'e mós sei halo ema seluk nia deskansa kalan la di'ak, liu-liu ba ema ne'ebé moras tensaun, derepente hakfodak bele mate fatin, tanba ne'e husu ba komunidade sira iha fronteira atu labele hola sasan sira ne'e," Arnaldo hateten ho sériu.(*)