Prosesu investigasaun lidera nafatin hosi Komandante SIK, Superintendente Xefe, José Maria Neto Moc ho ekipa IT Timoroan sira envolve direita suspeitu Diretór Elite Computer DP hodi koopera rekolla informasaun kona-ba prosesu koneksaun rede internet entre parte rua nian.
Hafoin halo tiha indentifikasaun, ekipa deside tesi kotu rede koneksaun internet hosi Kompañia Elite Computer ba liña ministériu sira inklui instituisaun governu no Komandu Polisia Nasionál Timor-Leste (PNTL) nian.
Antes tesi kotu fiu koneksaun internet ne’e, SIK rekolla hotu ona dadus no naran liña ministériu sira ne’ebé durante ne’e halo kontratu servisu ho kompañia ne’e.
Ekipa SIK mós halo kedas apreensaun ba dokumentu importante balun inklui materiál sira hanesan, data center, laptop, komputador no sasán evidensia seluk tan.
Tuir dadus ne’ebé Tempotimor asesu, liña ministériu sira ne’ebé halo kontratu mak Ministériu Administrasaun Estatál (MAE) (Kontradu Kansela Ona), Inspetór Jerál Estadu (IJE) inklui Komandu PNTL ne’ebé halo koneksaun ba rede internet ba CCVT iha kapitál Dili no Postu Integradu sira iha fronteira terrestre.
Hafoin halo tiha indentifikasaun, Advogadu Privadu hosi Juristas Advocasia, Julio Pereira Cardoso akompañia ninia kliente hodi asina karta deklarasaun hodi bele ba defende nia kliente iha prosesu primeiru interogatoriu iha Tribunál Dili.
Nune'e, ohin mós SIK kontinua halo investigasaun klean ba Diretór Jerál Kompañia Telekomunikasaun Telemor ho inisiál (TVB) akompañia hosi Advogadu Privadu, Pedro Aparicio iha edifisiu SIK Komandu Jerál PNTL. (*)