Komandante Polísia Tránzitu (POLTRAZ) minisípiu Dili, Superintendente Xefi, Domingos Sarmento Gama hateten, nia simu tan ona ordem ida husi komandu munisípiu Dili liu-liu komandante munisípiu Dili hodi servisu hamutuk ho eskuadra Verra Cruz atu orienta komunidade ne'ebé ohin loron halo hela bazar baratu iha hela área Kolmera.
"Ita nia komunidade sira balun hatene hela, mais parese situasaun mak halo. Balun kada vez lahatene, sira okupa tiha fali trotoar sira ne'ebé mak loloos ema uza hodi la’o liu ba mai. Mais agora ita nia komunidade sira toman ona, la'os ohin, tinan hirak ba kotuk mós ita nia komunidade kuandu tama ona loron boot Natal no tinan foun, sempre halo vida negosiu iha área Kolmera sempre uza trotoar", Superintendente Xefi Polísia, Domingos Sarmento Gama hateten liuhusi komferénsia imprénsa iha komandu PNTL Kaikoli, Kinta (26/11).
Nia dehan, trotoar ne'e uza ba ema la'o ain, la'os ba ema atu fa'an sasán, tanba polísia sei implementa ordén hodi kontrola komunidade labele faan iha trotoar leten.
"Ohin loron ita sei ba hasai ka atua komunidade ne'ebé fa'an sasán iha trotoar leten pertense área Kolmera nian, tanba iha kódigu estrada bandu faan iha trotoar", nia hateten.
Bainhira husu kona-ba karik Xefi suku sira mak orienta fa'an sasán ita trotoar leten nia dehan, situasaun ida ne'e labele akontese, tanba autoridade lokál laiha kompeténsia, lei de'it mak fó kompeténsia ba autoridade lokál.
"Ba trotoar ne'e ha'u hanoin laiha razaun atu autoridade lokál autoriza fali nia sidadaun sira halo negósiu, bele autoriza ba fatin sira ne'ebé maka livre, hanesan fatin sira iha kampu ruma ka, fatin ne'ebé ema la halo atividade viajen ha'u hanoin autoridade sira iha kompeténsia ba ida ne'e bele", nia fó hanoin. (*)
PUBLISIDADE