"Ha'u hanoin situasaun ida ne'e ita hotu hatene, ita hotu akompaña, prosesu tama ona ba iha Ministériu Públiku no lori ona ba Tribunál. Ita hein tuir mai, tribunál hasai desizaun oinsá hafoin ita hotu bele hatene", Portavóz Komandu Jerál PNTL, Superintendente Xefi, Arnaldo Araújo hateten lia hirak ne’e iha Kaikoli, Tersa (05/01).
Suspeitu MM nu'udár membru Polísia ida husi Unidade Batallaun Ordén Públika (BOP) ne'ebé hala'o kna'ar nu'udár seguransa pesoal ba Vise Ministru Justisa (MJ), José Edmundo Caetano.
Akontesimentu ne'e mosu iha loron 1 fulan Janeiru 2021 maizumenus tuku 04:00 Otl, iha aldeia 12 Outubru, Suku Komoro, Postu Administrativu Dom Aleixo, Munisípiu Dili.
Entretantu, Xefi Aldeia 12 Outubru, Pláscido Marçál hateten, kazu ne'e akontese bainhira vitima ho nia kolega halai ho velosidade aas hodi gas, nune'e ikus mai suspeitu MM hasai pistola hodi tiru vitima kona iha parte kanotak liman-loos borus ba liman-karuk.
"Vitima agora daudaun halo hela tratamentu iha Ospital Nasional Guido Valadares, tanba hetan kanek iha parte kanotak liman-loos no borus ba liman-karuk", Xefi Aldeia 12 Outubru, hateten.(*)