Vise-ministru Interiór, António Armindo informa, Ministériu Interior ho Ministériu Saúde desidi ona atu loke fronteira oitoan nune’e sira tama mai, tanba sira iha Atambua kuaze fulan ida ona, no iha Atambua mós ezije atu sira tenke fila ona mai Timor-Leste.
Nia dehan, durante sorumutu ho Primeiru Ministru no Ministru Interior, Taur Matan Ruak ko'alia kona-ba ida ne’e no hetan ona solusaun.
"Ohin ko'alia kona-ba ida ne'e, ita iha koordenasaun diak entre Ministériu Interior ho Ministeriu Saude no ita desidi ona katak, sira sei fila-fali mai, ita loke fronteira uniku ba sira par bele tama mai, tanba sira agora iha konsuladu. Maibe, tenke la'o tuir protokolu saude publiku nian nune'e labele lori risku mai iha Timor-Leste", Antonio hateten lia hirak ne’e hafoin sorumutu ho Primeiru Ministru no Ministru Interior Taur Matan Ruak iha palasiu Governu, Sesta (15/01).
Nia hatutan, iha ona konkordansia ba estudante timor-oan nain 20-resin iha Atambua hodi fila mai, maibe tenke tuir protokolu saude publiku atu kumpri mos kuarentena.
"Ita konkorda ona par dia 20 agora loke pelumenus oras ida hanesan ne’e ba sira par bele tama mai, depois sira ba kuarentena, importante mak sira tenke halo tuir regras saude publiku", nia esplika. (*)