Segundu Komandante PNTL munisípiu Dili, Superintendente Polísia, Euclides Belo dehan, durante observasaun polísia nian, iha sira nia atividade sensibilizasaun ho sosializasaun ne'ebé sira halo, komunidade barak mak kumpri ona regras Estadu Emerjénsia (EEL dasia nian.
"Tanba ne'e maka parte PNTL nia haree katak 75% ne'e, ita nia sidadaun iha Dili ne'e sira sente katak ne'e importante, tanba ne'e maka ita haree katak ita nia komunidade ne'ebé halo movimentu iha Dili ho motor, kareta, ita observa jeralmente, kuandu sai husi uma, sira uza máskara", Superintendente Polísia, Euclides Belo hateten iha nia kna'ar-fatin, tersa (19/01).
Nia hateten, maske PNTL rasik seidauk iha gráfika ruma hodi sai nu'udár indikadór atu haree ema na'in hira mak kumpri, hira mak la kumpri, maibé jeralmente sira haree katak komunidade sira iha ona konsiénsia rasik hodi kumpri hanesan uza máskara.
"Sira konsiente katak Covid-19 ne'e fó ameasa ba ema nia vida, la'os ameasa de'it, kuandu kona ne'e mate. Tanba ne'e maka duke ita mate, di'ak liu ita prevene", nia dehan.
Nia mós informa, durante sira nia sensibilizasaun, iha komunidade balu mak la uza máskara, maibé PNTL, liu-liu servisu sekreta, polisiamentu komunitáriu sira husu dehan, sira laiha duni maskara atu uza.
"Tanba ne'e maka PNTL husu apoiu ba parte Saúde nian fó apoiu máskara, i ami sempre rezerva máskara rua-tolu iha kareta laran, kuandu sira laiha, ami fó", Euclides subliña.
Nia hatutan, durante halo sensibilizasaun, parte konjunta hanesan PNTL ho MS sempre esplika mós ba komunidade sira kona-ba funsaun loloos husi uza máskara mak atu proteze aan husi moras oioin, liu-liu halo prevensaun ba surtu Covid-19 iha TL.(*)