Diretór Ezekutivu Fundasaun Mahein (FM), João Almeida hatete, aseita ho hanoin atu kria Task Force hodi atua movimentu ilegál maibé la aseita kriminaliza sidadaun sira-ne'ebé ho esforsu aan mesak hakat fila mai nia rai rasik.
Tuir nia, estadu TL abandona nia sidadaun iha estranjeiru durante pandemia Covid-19 akontese iha mundu no sai ameasa ba saúde.
"Bainhira rai hotu-hotu evakua nia ema bainhira Covid-19 ameasa iha ema-nia rai, estadu Timor-Leste abandona tiha sira, entaun bainhira fila ho meiu ilegál ne'e presiza tenke haree no apresia sira-nia konsiénsia, maske tama ilegál maibé sira entrega-aan ba polísia no saúde nian atu kuarentena," dehan João ba www.tempotimor.com iha nia Knar fatin Fomento Dili, tersa (26/01).
João akresenta atu sidadaun sira-ne'ebé mak ilegalmente tama mai TL tenke kolabora ho parte seguransa no saúde nune'e bele submete ba kuarentena hanesan parte kontribuisaun ba prevensaun Covid-19.
Antes ne'e Ministru Defeza, Filomeno Paixão hatete presiza kria Task force husi institusaun relevante tanba konsidera defeza no seguransa nasionál iha fronteira la'ós responsáblidade husi parte defeza no interiór nian de'it, maibé iha ministériu hotu-hotu tenke kria liña koordenasaun.
Nune'e mos Brigadeiru-Jeneral Joao Miranda 'Aluc' konsidera movimentu tama-sai ilegál risku tebes tanba relasiona ho surtu covid-19 no husu atu governu fó sansaun disiplinár ida ne'ebe maka'as ba sidadaun sira tama ilegál iha fronteira.(*)