Diretór Ezekutivu FM ne'e hateten, estátua ne'e rasik tama iha 30 dezembru 2020, maibe bainhira iha informasaun husi Alfándega liuhusi detkta mákina Raiu-Xís katak deskonfia iha drogra, entaun PNTL iha devér obrigasaun atu halo investigasaun no identifikasaun tuir Kódigu Penál no lei kombate droga.
"Ne'e faillansu servisu alfándega nian iha fronteira no presiza reforma duni servisu sira iha fronteira nian hanesan alfándega," dehan João iha ba www.tempotimor.com iha nia Knar fatin Farol Dili, Tersa (26/01).
João hatutan, faillansu husi alfándega antes ne'e mosu ona hanesan sidadaun na'in-rua ne'ebé mákina Rau-Xís deteta ona maibé la sobu ikus mai konsege kapturadu iha Indonézia.
Kazu hanesan mos dadaun ne'e akontese tan ba estatua Nossa Senhora ne'ebé mak antes ne'e mákina deteta no deskonfia iha droga maibé servisu Alfándega la fó informasaun sedu hodi PNTL kontinua halo indentifikasaun.
"Ne'e la'ós sala PNTL nian, loloos ita agradese ba PNTL nia servisu hodi solusiona polémika ne'e rasik, loloos hadi'a alfándega iha fronteira la'ós PNTL nia kulpa," dehan João.
Antes ne'e iha loron 21 Janeiru 2021, Ekipa Konjunta Servisu Investigasaun Kriminál Nasionál (SIKN), Polísia Militár (PM), Servisu Nasionál Intelijénsia (SNI), no Alfándega Departamentu Anti-Fraude, halo identifikasaun relasiona ho deskonfia estátua Nosa Señora de Asunção rai material ai-moruk droga iha laran, hafoin iha prosesu investigasaun sobu estátua rezultadu hatudu la iha drogra.
Hafoin sobu ekipa foti mós amostra rai-mean ne'ebé deskunfia droga hodi lori ba halo teste iha laboratóriu, maibé prosesu indentifikasaun hatudu negativu, tanba ne'e objetu rai rua ne'ebé parte seguransa dekonfia nu'udár materiál hatodan ne'ebé tékniku monta hodi hatúr metin Illas Nai Maromak ne'e.(*)