Kalan rua ona, iha loron 17 ho 18 Fulan Marsu tinan 2021, grupu juventude ne'ebé dadaun hela iha Eis-Merkadu Komoro halo asaun asaltu ho tuda malu.
Tuir observasaun www.tempotimor.com iha terenu nota katak, situasaun asaltu no tuda malu ba kalan daruak ne'e akontese maizoumenus iha tuku 8:00 kalan ne'ebe involve grupu joventude ida husi parte tasi ibun pantai-kelapa no seluk sira ne'ebe hela nanis iha Eis-Merkadu Komoro laran.
Iha situasaun ne'e, inan feto ho labarik ki'ikoan sira maioria halai hotu bá estrada públiku diresaun rotunda Nikolao Lobato nian, tanba, trauma ho hahalok husi grupu juventude rua ne'e nian.
Iha tuku 9:00 parte autóridade seguransa ho karreta kuaze 4 ou 5 to'o kedas iha fatin hodi halo atuasaun ho maneira si'ak ho hakilar.
"Para, Para hare tama uma laran," hakilar husi membru forsa seguransa no Defesa sira ne'ebe halo patroliamentu iha fatin ne'eba.
Autoridade seguransa konsege kaptura juventude balun hodi lori direita kedas bá kumpri detensaun.
Ho situasaun ne'e, parte seguransa sidauk hases an husi fatin akontesimentu, tanba hala'o hela patrolla hodi asegura situasaun iha komúnidade Eis-Merkadu Komoro nia leet.
Situasaun grupu rua halo asaun ba malu ne'e, akontese uluk iha loron 17 fulan Marsu tinan 2021, maizoumenus tuku 9:00 kalan.
To'o notisia ne'e públika, tempotimor sidauk halo komfirmasaun bá parte ne'ebéresponsabiliza autóridade seguransa nian, tanba kondisaun kalan boot. (*)