Liuhusi konferénsia imprénsa, Segundu komandante PNTL munisipiu Dili, Superintendente Polísia Euclides da Costa Belo, husu atu sidadaun hotu bele hakmatek hodi lao tuir lei.

"Sé mak vitima, mai hato'o keixa, para sé mak suspeita, prosesu sira, e labele halo tan krime seluk, amesa malu lei bandu, halo ataka malu, lei mós bandu”, dehan Komandante Belo iha nia kna'ar fatin Kaikoli, kuarta (24/03).

Komandu PNTL Munisípiu Dili fiar katak ho anúnsia ne'ebé sira fó sai ne'e, bele kontribui ba ema hothotu nia di'ak, bele garante estabilidade la'o ho di'ak, nune'e ema hotu bele luta hasoru peste Covid-19.

"Embora ita komnate Covid-19, ita ba halo tan krime seluk para bele haterus ema. Tanba ne'e mak PNTL sein pursentu, garante nafatin. Husu para koolaborasaun, lalika tan ona halo vídeo tun sa'e iha mídia sosial para depois bele dezestabiliza filafali situasaun e hatauk ita-nia komunidade”, haktenik Euclides.

Husu ba sidadaun hotu atu kontribui ba estabilidade, no komandu PNTL Dili, Ofisial Polisia Suku (OPS), sei halo koordenasaun mós ho lideransa lokál inklui membru GAM sira atu hothotu iha responsabilidade ba asaun sira ne'ebé halo.

Bainhira asaun ne'ebé halo la tuir prosedimentu legál ne'ebé hasai husi Komisaun Reguladóra Artes Marsiál (KRAM) determina, tenke submete ba prosesu.

"Hothotu tenke komprimenta regra ne'ebé mak KRAM fó sai ona, e ameasa malu ne'e la kontribui ba estabilidade nasionál, baku malu, tuku malu ne'e la kontribui. Treinu tuir rekezitu sira ne'ebé KRAM fó sai ona”, hatete nia.

Maibé, alerta ba públiku hotu iha Kapitál nasaun, hahú tuku 10 kalan hothotu tenke hakmatek ona iha uma, tanba polísia sei halo operasaun konjunta.

"Kuandu tuku 10 ba leten sémak sei iha luron, la tama uma, konsidera mós la kumpri ona serka sanitária, konfinamentu urjensia ne'e sira la kumpri. Purtantu, ida ne'e mós polísia bele foti medida atubele garante nafatin”, apela nia.

Medida sira ne'ebé polisia foti ne'e lei fó dalan hodi nune'e garante seguransa ba estabilidade iha Kapitál Dili.(*)