Haree ba númeru kazu pozitivu ne’ebé kada loron aumenta nafatin, Timoroan hotu presiza fó kontribuisaun hodi bele prevene no kumpri regra sira iha Estadu Emerjénsia ni serka sanitária.

“Luta ida-ne'e oin-seluk. Ita labele hasees ema ida no laiha ema ida bele hasees-an hosi luta ne’e. Tempu to’o ona atu ita hothotu, no ita ida-idak, fó ita-nia kontribuisaun atu hamutuk hakaat liu susar ida-ne’e”, afirma PR Lú Olo liuhusi mensajen ba aniversáriu PNTL dala-21, sábadu (27/03).

Xefe estadu dehan, tenk hamutuk hodi hapara pandemia ida-ne’e no tau aas interese públiku no proteje Nasaun nia murak boot liu interese privadu, grupu no polítiku.

“Maluk sira ne’ebé iha responsabilidade aas iha ita-nia sosiedade labele haluha no labele halo ema haluha risku ne’ebé mak asosia ho Covid-19. Sira labele hasees-an no labele halo ema hases-an husi medida sira ne’ebé Governu foti atu prevene no hamenus vírus Covid-19 hada’et husi ema ba ema”, dehan nia.

Iha situasaun krize ne’ebé grave, hanesan situasaun pandemia ne’ebé Timor-Leste hasoru daudaun ne’e, i tenke halo jestaun ida ne’ebé efikás no efisiente.

Nune’e, presiza hatene saída mak atu halo, halo planeamentu, organizasaun, asaun no avaliasaun beibeik no tenke foti desizaun oioin ho lailais.

“Ba ida-ne'e, ita presiza rekursus hothotu, umanu, ekipamentu no orsamentu iha tempu badak nia laran atu nune’e organizasaun no instituisaun sira bele atua kedas”, afirma Lú Olo.

Maske, Sentru Integradu Jestaun Krize – nu’udar estrutura ida ne’ebé hari’i ho mekanizmu ida ne’ebé iha komandu, kontrolu no koordenasaun entre instituisaun sira hatudu dadaun katak bele hatán di’ak ba krize ida-ne’e tanba la’o tuir kultura koopera malu no fahe malu sira-nia rekursus no sistema informasaun no komunikasaun. (*)