PNTL ne’ebé hari’i iha loron 27 fulan-Marsiál tinan 2000 iha tempu tranzisaun ninia hodi prepara ba restaurasaun independénsia Repúblika Demokratika Timor-Leste (RDTL), maske tinan 20 liuba selebrasaun Aniversáriu la’o diferente ho tinan 2021, tanba selebrasaun akontese iha tempu Estadu Emerjénsia nia laran.
Prezidente Repúblika (PR), Francisco Guterres ‘Lú Olo’ iha ninia mensajen ba aniversáriu ne’e hatete, Timor-Leste hahi’i instituisaun PNTL iha situasaun emerjénsia, tanba moras Covid-19 ne’ebé sai amesan ba mundu.
“Ita-nia Nasaun hasoru dadaun situasaun oin-seluk ida no ida ne’e obriga ita selebra mós oin-seluk loron aniversáriu Polísia Nasionál Timor-Leste ba dala rua nulu resin ida. Ita hahii PNTL iha situasaun emerjénsia saúde públika ida nia laran ne'ebé mai hosi pandemia COVID-19”, afirma PR Lú Olo liuhusi mensajen ba aniversáriu PNTL, sábadu (27/03).
Entre instituisaun públika sira-ne’ebé hola parte iha luta ida-ne’e, PNTL hamriik iha liña oin hodi tau matan ba sidadaun hotu nia seguransa no saúde.
“Tanba ne’e, ha’u hakarak hato’o ha’u-nia hako’ak boot ba Instituisaun ida-ne’e, ba feto no mane sira hotu ne'ebé loroloron dedika no sakrifika sira-nia an tomak atu garante seguransa no moris-di'ak ba Timoroan sira”, hatete nia.
Aproveita loron aniversáriu PNTL nian hodi saúda PNTL liuhusi Komandante-Jerál Komisáriu Faustino da Costa no Segundu Komandante-Jeral Mateus Fernandes.
“Luta hasoru COVID-19 sai hanesan oportunidade di’ak ida atu tetu ita-nia reziliénsia nasional hasoru dezafiu boot liu iha Timor-Leste nia istória dezde ita Restaura ita-nia Independénsia iha 20 maiu 2002”, dehan nia.
Tanba, krize ida-ne’e obriga Timor-Leste sai husi situasaun normalidade konstitusionál no tama iha situasaun Estadu emerjénsia katak ba fali situasaun exesaun konstitusionál ne’ebé limita sosiedade nia lala’ok no ohin loron labele rekuperasaun ekonómika Nasaun nian. (*)