Print this page

Populasaun 'Ezije' fila ba Munisipius, PNTL haruka fila

Komunidade sira iha ona pontu Entrada no saida Tasi Tolu, Sexta (2/4) Komunidade sira iha ona pontu Entrada no saida Tasi Tolu, Sexta (2/4) Foto Tempo Timor

Tempotimor (Dili)- Iha sexta loron 02 fulan Abril tinan 2021, hahú kedas iha tuku 05:00 dadersaan, populasaun sira ne'ebé hela iha kapitál Dili, nadodon ba iha porta saida no entrada Manleu iha Metinaro, Mota ulun Komoro, no TasiTolu hodi 'ezíje' atu sai husi Dili fila ba sira nia munisipiu, maibé tuir observasaun too iha pontu entrada Tasitolu, membru Polísia Nasional Timor-Leste (PNTL), la fó sira liu no haruka fila.

Mario Soares, nu'udár sidadaun ida husi munisipiu Ermera, Postu Administrativu Railaku dehan, hakarak fila ona ba nia munisipiu, maibé to'o iha Tasitolu, membru polísia sira ne'ebé halo hela seguransa, la loke dalan no haruka sira tenke fila.

Nia dehan, razaun nia ho família hakarak fila ona ba foho, loas tanba moras surtu Covid19, maibé tanba nesesidade atu uza moris kada loron nian durante tempu serka sanitária iha Dili mak laiha ona.

"Ha'u ho oan no ferik-oan, ami atu fila ba Railaku, mais dalan ema taka ba ne'e. Ami ba la'os dehan covid lae, ami ba ne'e tanba hahan laiha ona. Ami servisu iha kompañia mós agora para hotu, entaun ami osan laiha ona", dehan Mario hafoin PNTL haruka sira fila iha pontu entrada Tasitolu Dili, sexta (02/04/2021).

Tuir observasaun www.tempitimor.com iha terrenu nota katak, laos de'it populasaun husi Dili mak atu fila ba munisipiu, maibé sira husi munisipiu Bobonaru, Ermera no Likisa mós hakarak fila hotu mai Dili, maibé PNTL haruka sira tenke fila, tanba seidauk iha desizaun formal ruma governu.

Alende ne'e, hahú husi oras dadeesan to'o tuku 9 liu ne'e, populasaun kuaze rihun resin iha Dili mak polisia haruka fila ona, maibé komunidade sira husi munisipiu tolu seluk iha ona pontu entrada ezije tama mai kapital Dili, sei hamri'ik forma no hein hela iha pontu entrada Tasitolu.

Maske nune'e, polísia mós autoriza dadaun sidadaun balu husi munisipiu tolu tama mai kapitál nasaun, tanba hetan ona karta autorizasaun husi Sentru Integradu Jestaun Kríze (SIJK) husi munisipiu.(*)

Rate this item
(1 Vote)
Last modified on Friday, 02 April 2021 23:22
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com