Bazeia bá serka sánitaria no konfinamentu domisiliáriu obrigatóriu, ne'ebé governu deside estende tán loron 14 ba Munisípiu Dili, no loron 7 ba Baukau ho Vikeke, mak autóridade seguransa kontinua implementa regra bandu ema ne'ebé halo movimentu ba mai laiha atividade urejensia inklui ba Munisípiu.
Haree ba akontesimentu iha loron sesta (02/04) dader komunidade barak mak koko halo viajen husi Díli ba Munisípiu iha parte leste, maibé membru PNTL sira iha área Fatuahi implementa regra serka sánitaria no konfinamentu domisiliáriu obrigatóriu ho rigorozu, tanba la autóriza ema sai husi Dili ba Munisípiu seluk.
Pesoál PNTL ne'ebé kontrola hela movimentasaun iha área Fatuahi lakohi publika naran hatete, iha ne'e hala'o servisu 24 oras hodi kontinua bandu ema halo viajen ba Munisípiu.
"Iha ne'e, ita la autóriza ema ba Munisípiu, tanba agora serka sánitaria”, dehan pesoál PNTL ne'e, iha Fatuahi, sesta (02/04).
Implementa regra ne’e, PNTL mantein kontrola movimentu ema nian iha área Fatuahi oras 24 nia laran.
Komúnidade, Cesaltino Guterres ho nia kolega na'in-4, ne'ebé dadaun iha hela Fatuahi atu viajen ba Munisípiu Baukau, Postu Administrativu Venilale, maibé parte seguransa PNTL la autóriza, tanba dadaun serka sánitaria funsiona hela ba Munisípiu Dili, Baukau, no Vikeke.
"Ami atu ba Venilale, ami na'in-5, maibé polísia lakohi fali ne'e, serka sánitaria aumenta tán ona ne'e, ita iha Dili atu han sáida”, dehan nia.
Maske nune’e PNTL kontinua bandu viajen ema nia ba Munisípiu, tanba atu kombate moras Covid-19 ninia hada'et ba sosiedade nia leet. (*)