Segundu Komandante PNTL Munisípiu Dili, Superintendente Polísia Euclides Belo dehan, maske estrada ligasaun Munisípiu Aileu ho Dili iha Beduku Manleuana nian kotu, maibé membru sira kontinua asegura iha postu foun.

"Portaun entrada ita sei koloka nafatin, mezmu ke Beduku iha tempu udan ne'e, estraga totál hotu kedas no muda tun fali mai kraik, maibé ita orienta para iha vizibilidade hodi garante nafatin ita-nia komunidade sira para kumpri nafatin regra estadu emerjénsia no serka sanitária iha munisipiu Dili”, hatete komandante Euclides iha Kaikoli, kuarta (07/04).

Maske udan ho inundasaun, maibé komandu PNTL Munisípiu Dili apresia ba nia pesoál sira ne'ebé garante nafatin seguransa, tanba durante ne'e sira halo esforsu maka'as tebes.

Husu mós ba komunidade sira iha kapitál Dili no Munisípiu bainhira hakarak atu tama-sai, tenke tuir prosedimentu protokoler ne'ebé hasai husi sala situasaun-Sentru Integradu Jestaun Kríze (SIJK) nian.

"Katak sira ne'ebé mak iha gia-marsa, mak ita bele autoriza sira tama, ou sai. PNTL sei la fó tama sira ne'ebé mak foin tuir swab teste de'it, maibé gia-marsa laiha, ita sei la autoriza para tama ho sai”, dehan nia.

Tanba ne'e, PNTL Munisípiu Dili nafatin ezekuta regra ne'ebé hasai husi SIJK, no husu komunidade atu kumprimenta.

Maibé, dadaun ne'e PNTL Munisípiu Dili destaka mós nia membru sira hodi halo seguransa ba vítima inundasaun sira ne'ebé oras ne'e hela provizóriu iha sentru evakuasaun sira iha kapitál Dili hanesan, edifísiu MF, SPES, CVTL, Liceu-UNTL, Infordepe inklui Dom Bosco-Komoro. (*)