Komandante PNTL munisípiu Dili, Superintendente Polísia, Henriques da Costa, haktuir iha loron 06 fulan-maiu tinan 2021, maizumenus tuku tolu lorokraik, polísia postu vizilánsia Tasitolu, halo pasa revista ba sidadaun sira ne'ebé atu tama no sai husi munisípiu Dili.
Durante halo passa revista, polísia konsege deskobre karreta ida ho marka Suzuki Carry, kór mutin númeru matrikula A.20-020 TL, hamutuk ho sidadaun na'in-rua iha karreta laran, ho inisial AP nu'udár kondutór no CTBS nu'udár sasán na'in.
Sidadaun mane na'in rua ne'e, hatudu dokumentu hanesan, karta guia da marça tahan rua, maibé, la'ós orijinál ka kópia, atestadu médiku tahan ida, suspeitu CTBS mak taka de'it nia naran ba, la'ós dokumentu auténtiku hasai husi SIJK, ho dokumentu atestadu saúde, rezultadu swab tahan ida.
“Haree ba dokumentu falsu hirak ne'e, mak polísia halo kedan detensaun ba sira na'in-rua, no prende dokumentu falsu ne'ebé sira lori, hodi submete ba prosesu tribunál ho númeru prosesu NUK.0220/2021DICLM, Artigu 303 falsifikasaun ba dokumentu ka notasaun tékniku ninian”, hatete Henrique, Kaikoli, sesta (07/05).
Sidadaun na’in-rua ne'e, sira husi munisípiu Likisá ninian atu tama filafali mai Dili, ho razaun sira sosa modo no fa'an filafali.
“Buat ne'ebé mak sira hatete ba ami katak, ho situasaun ida hanesan ne'e, sira difikuldade ba iha ai-han ninian, entaun sira hatete katak, tanba kabun mak obriga, mak sira halo hahalok ida hanesan”, haktuir nia.
Entretantu, molok ne'e iha fulan ida ba kotuk, husi Sentru Integradu Jestaun ba Krize (SIJK) mós, identifika no bolu ona sidadaun balu ne'ebé halo kópia dupla ba iha dokumentu, lori ba aprezenta iha komandu munisípiu Dili.
“Ita halo ona prosesu ida ne'e, la'ós ba primeira vez, maibé ba dala tolu ona. Primeiru ninian, hamutuk na'in-5, tuir fali ohin nian iha na'in-2”, nia hakotu. (*)