Diretór Ezekutivu FONGTIL, Daniel Santos do Carmo hatete, Polísia Nasional Servisu Investigasaun Kriminal (PNSIK) halo fali karta notifikasaun hodi notifika funsionáriu FONGTIL ida sai suspeitu ba kazu visum insidente iha Tasitolu.

“FONGTIL konsidera topu lideransa máximu PNTL inkapasidade no demonstra atitude defende-an, la rekoñese sira-nia inkapasidade intermu halo jestaun ba instituisaun PNTL, ikus mai membru sira-nia atuasaun iha terrenu dezorganizadu”, dehan nia liuhusi konferénsia imprénsa iha Kaikoli, tersa (01/06).

Notifikasaun ne'ebé halo husi pesoál PNTL, iha Servisu Investigasaun Kriminal Nasional ba FONGTIL, relasiona ho kazu publikasaun Visum husi vítima Octavio Thai nian, konsidera atu ida ne'ebé opta tomak rejíme ditadura Indonézia nian iha tempu Soeharto nian, no Pais sira ne'ebé rejíme ditadura ukun hodi la fó espasu ba sosiedade sivíl atu halo krítika, baze ho dadus.

“Rezultadu publikasaun ne'e, versaun FONGTIL nian, laiha autoridade atu husu halo visum, maibé problema ne'ebé akontese mak dala barak, visum sira sai tiha problema, tanba kleur demais ikus mai muda fali estatutu kazu, husi kazu grave ba fali kazu simples”, hateten nia.

Tanba ne’e, rekomenda ba PNTL atu labele iha tendénsia hodi salva polísia ne'ebé komete kríme, maibé tenke proteze vitíma liuhusi promove lia-loos no justisa.

Hatán ba kestaun ne'e, Komandante jerál PNTL, Komisáriu Faustino da Costa dehan, nia lakohi halo komentáriu barak, maibé iha lei kódigu prosesu penál ko’alia klaru, bainhira kazu ruma mak rejísta ona iha parte justisa nian, siknifika dadus saida de'it mak iha, sai ona hanesan segredu ba justisa.

"Ha’u hanoin buat ne’ebé ke segredu justisa nian ne’ebé ha’u sei la responde to’o ba ida ne’ebá. Ida ne’e atu dehan de’it la’ós komandu más ita-nia lei fó dalan ba ida ne’e, ne’e de’it”, afirma nia. (*)