“Ida ne'e problema boot, sira mai informa, ha'u preokupa ita timoroan 20 ital ou 30 anos mak la koñese Prezidente Repúblika, la koñese Primeiru Ministru ne'e, ema ne'e bulak”, dehan Lere hafoin sorumutu ho Prezidente Repúblika, Francisco Guterres ‘L’u Olo’, iha palásiu prezidensiál Bairopite, kuarta (09/06).
Haree ba problema ne'e, ekipa selesaun hakarak elemina kedan kandidatura refere, maibá nia rasik dehan, la bele fó sala de'it joven sira, fó sala mós ba ukun na’in sira.
Tanba ministériu edukasaun la hanorin tau imajen xefe estadu no Xefe Governu, tanba liuhusi ida ne’e sidadaun foin bele koñese.
“Ema la koñese ne'e ita moe, maibé rekrutamentu ida ne'e hanesan lisaun ba ita hotu tanba joven barak iha foho ne'ebá ne'e hein bibi, ou karau, laiha televizaun tan, entaun la koñese”, dehan Lere.
Tanba iha buat barak ne’ebé sei presiza haree husi teste ne’e, maibé importante mak saúde la di’ak kandidatura refere tenke eliminadu.
Nune’e, Diretór Asia Justice and Rights (AJAR), Jose Luis Oliviera hatete, ida ne'e konsekuénsia husi sistema kurikulu edukasaun mak ladi'ak.
“Tanba ita-nia kurikulum edukasaun ne'e ema portugués sira mak halo, ne'e duni kurikulu ida ne'e la orienta ita atu hatene ita-nia kondisaun, atu ema aprende, ne'e duni lamentasaun ne'e razoavél, tamba iha ne'ebá la hanorin sistema no la hanorin situasaun”, dehan nia. (*)