“Ami mai ne'e, Xefe Estadu Tenente Jenerál Lere Anan Timur la mai, mais ami na'in-1 mai aprezenta situasaun jerál pais, iha momentu ida agora ne'e ami foku liuba situasaun espesifiku ne'ebé halo rekrutamentu foun ba selesaun rekrutamentu iha Metinaro no nia prosesu ida ne'e de'it”, informa Falur hafoin reuniaun ho Prezidente Repúblika iha palásiu prezidensiál Bairopite, kuarta (16/06).

Maibé kona-ba kandidatura na'in hira mak esklui ka pasa iha teste ne’e hein de'it tempu badak sei hato'o nia rezultadu ba públiku no ba konkorente sira.

“Ha’u hanoin ita-boot sira hein dala ruma imi hetan informasaun barak liu ha'u, ne'e la'ós ha'u-nia área ha'u parte administrasaun finansas no aprovizionamentu, ne'e xefe Estadu Maior nia maibé la'ós ami ko'alia bebeik maibé imi mós tenke sente kontribui di'ak labele halo degradasaun ba sentidu patriota nazionalismu iha ita-nia rai ne'e tenke limita ita-nia pergunta”, deklara Falur.

Kona-ba rekrutamentu F-FDTL meius ne'e barak hanesan seleksaun dokumentu, aprezenta ho rekejitu ida Corona nian, intervista, sukat altura hafoin teste matan, Tilun, halo ezersisiu fiziku, eskrita no orál hafoin soma pontu ne’ebé hetan hodi foti desizaun.

“Ikus mak bele foin haree rejultadu hotu hodi deside se mak pasa no semak lapasa”, haktenik nia.

Kona-ba situasaun jerál dadaun ne’e di'ak maske mundu hasoru mak Corona Virus ne'e, maibé númeru menus ona tanba ema barak kumpre ona regra husi organizasaun mundiál saúde no ministériu saúde hoodi simu vasina.

“Situasaun ba arte marsál mós ema barak toma konsiénsia ona tanba ne'e redúz ona problema”, relata nia.

Maibé husu ba sidadaun hotu liliu orgaun komunikasaun sosiál sira atu hato'o mensajen liuhusi edukasaun sivika ba joven sira ne'ebé mak iha liur, nune'e bele hanoin ba futuru.(*)