Adeptu sira ne’ebé tuda malu no harahun rezidénsia Padre sira-nian, bainhira asiste jogu entre ekipa selesaun Portugal kontra selesaun Alemaña iha Estadiun Allianz Arena Muniké (Alemaña), domingu (20/06) liuhusi televizaun.

“Iha domingu (20/06) madrugada depois de jogu entre Portugal ho Alemaña ninian, iha mós insidente balu ne'ebé mak la podia akontese, tanba ema joga iha liur, maibé ita iha Timor, iha Dili, ita mak kria filafali instabilidade ka kria fali problema. Iha situasaun ida ita nota katak iha parte Kuluhun ninian, iha apoiante husi ekipa Portugal ninian ho Alemaña nian tuda malu, erezulta rezidénsia ka uma ba Padre sira-nian iha Kuluhun ne'e hetan estragu”, hateten Komandante PNTL munisípiu Dili, Superintendente Polísia Henrique da Costa, iha Kaikoli, segunda (21/06).

Hafoin akontesimentu, autór sira ne'ebé PNTL konsidera sai suspeita ba insidente ne'e, halai lakon no seidauk entrega-an, tanba ne'e Komandu PNTL Munisípiu Dili, liuhusi servisu investigasaun sei buka tuir hela sira-nia paradeiru hodi kaptura no prosesa tuir lei.

“Ita-nia parte investigasaun Cristo Rei, halo hela prosesu iha domingu (20/06) ne'e, e agora parte servisu informasaun ninian, ita tenta buka tuir hela informasaun ruma kona-ba suspeitu ka autór sira ne'ebe maka envolve iha tempu ne'ebá.

Tanba PNTL postu administrative Cristo Rei hala’o hela investigasaun, dadaun ne’e halo hela servisu hodi buka identifika autor sira ne’ebé envolve iha insidente refere.

“La'ós iha ne'ebá de'it, maibé mosu mós tuda malu iha fatin balu iha área Dom Aleixo ho Verra Cruz ninian, maibé tanba Envolvimentu ita-nian patrulla barak, entaun hapara tiha hotu krime sira ne'ebé mak akontese”, hateten nia. (*)