Entretantu iha Domingo kalan liubá, forsa espesial ida hosi instituisaun F – FDTL hetan kanek todan, tanba deskonfia ta’an hosi eis membru arte marsiais nain lima (5) iha área Bebonuk, Dili.

Hafoin akontesementu ne’e, polisia mós konsege ka’er kedas eis membru arte marsiais nain lima ne’ebé deskonfia nu’udar suspeitu ba iha krime atentadu homesidu ne’e. Suspeitu eis arte marsiais nain lima ne’e ho naran inisial NB, AC, LP, KB, no DS.

Ho kestaun ne’e, Maijor Jeneral, Lere Anan Timur katak, nia sei ko’alia ho komandante jeral PNTL atu halo atuasaun ba atividade ilegal sira iha rai laran.

"Buat hotu ne'ebé lei bandu, governu bandu ne'e ilegal. Ilegal ne'e ita iha aparellu nasaun nian mak F-FDTL no PNTL hodi hasoru ilegal sira ne'e, para atu kontrolu," dehan Maijor Jeneral Lere ba jornalista sira iha Palásiu Prezidensial Bairro Pite, Dili Kuarta (17/07).

Lider fitun rua ne'e sei halo enkontru ho komandante jeral Polisia Nasional Timor Leste (PNTL).

"Orsida ha'u sei enkontru ho komandante jeral PNTL, ami sei rezolve problema iha rai laran," dehan LAT.

Entretantu, komandante jeral PNTL, Komisariu Faustinho da Costa katak polisia konsege ka’er ona ema nain lima mak deskonfia sai suspeitu ba iha krime atentadu homesidu ne’e, no parte Polisia Militas mós oras ne’e hala’o hela prosesu investigasaun ba suspeiu nain lima ne’e.